प्रदक्षिणा रस्त्याच्या डांबरीकरणासाठी ५ टेंडर निघाले

काम निकृष्ट होऊ नये,नागरिकांकडून व्यक्त होतेय अपेक्षा 

गतवर्षी पंढरपूर नगर पालिकेस प्राप्त झालेल्या यात्रा अनुदानातून प्रदक्षिणा रस्त्याचा काही भाग व चौफाळा ते छत्रपती शिवाजी महाराज चौक हे रस्ते सुमारे सव्वातीन कोटी रुपये खर्च कॉक्रीटीकरण करण्याच्या निर्णय नगर पालिकेने घेतला होता.या बाबत एप्रिल महिन्यात टेंडरही कढण्यात आले.तर यात्रा अनुदानाचा विनियोग शहरातील निवासी मालमत्ता धारकांना काही प्रमाणात करमाफी देण्यासाठी करण्यात यावा अशी मागणीही पुढे येऊ लागली.सोलापूर जिल्ह्याचे पालक मंत्री दत्तात्रय भरणे यांच्या उपस्थितीत झालेल्या आषाढी यात्रा नियोजनाच्या बैठकीत भगीरथ भालके यांनीही हीच मागणी केली होती.मात्र प्रदक्षिणा रस्त्याचे कॉक्रीटीकरण झाले पाहिजे या भूमिकेवर नगर पालिकेचे पदाधिकारी आणि प्रशासन ठाम असल्याचे दिसून आले.मात्र आचणकपणे आता नगर पालिका प्रशासनाने आपलाच निर्णय बदलून प्रदक्षिणा रस्ता डांबरीकरण करण्याचा निर्णय घेतल्याचे दिसून येत असून यासाठी जवळपास सव्वादोन कोटी रुपये खर्च अपेक्षित असून या एका कामाचे एकूण ५ टेंडर काढण्यात आले आहे.       

पंढरपूर शहरातील प्रदक्षिणा रस्ता तसेच चौफाळा ते छत्रपती शिवाजी महाराज चौक या रस्त्यावर मोठ्या प्रमाणात खड्डे पडले असल्याने  नाराजी व्यक्त होत आली आहे.आता या ठिकाणी खडीकरण आणि डांबरीकरण केले जाणार असले तरी गेल्या तीन वर्षात पंढरपूर नगर पालिकेने शहरात अशाच प्रकारे खडीकरण व डांबरीकरण केलेल्या अनेक रस्त्यांची पाच -सहा महिन्यातच वाट लागल्याचे दिसून येते.एकीकडे शहरात विविध विकास कामे हाती घेतली जात असताना सामान्य नागरिक समाधान व्यक्त करतात आणि जेव्हा सदर कामे निकृष्ट दर्जाची करण्यात आलेली आहेत अशी टीका होऊ लागते तेव्हा त्याची दखल घेण्याची तसदी दाखविली जात नाही.ना संबंधित ठेकेदारावर कुठली कारवाई केल्याचे दिसून येते.         

 पंढरपूर नगर पालिकेची निवडणूक दोन महिन्यावर येऊन ठेपल्यामुळे शहरात राजकीय घडामोडीना वेग येऊ लागला आहे.त्याच बरोबर शहरात विविध रस्त्याच्या कामाचाही धडाका नेमका याच कालावधीत सुरु होणार असून प्रदक्षिणा रस्त्याच्या पाच टेंडर बरोबरच जवळपास ९ कोटी रुपये खर्च अपेक्षित असलेले  शहरातील विविध रस्त्यांचे टेंडर मागील महिन्यात काढले गेले आहे.त्यामुळे शहरातील अनेक रस्ते चकाचक होणार असले तरी कोट्यवधी रुपये खर्च करून करण्यात येणारे हे रस्ते निदान दोन तीन वर्षे टिकावेत अशी अपेक्षा व्यक्त होऊ लागली आहे.