गोकुळ शुगर्सचे चेअरमन भगवान शिंदे यांचा संशयास्पद मृत्यू

गोकुळ शुगर उद्योगाचे अध्यक्ष भगवान शिंदे यांचा मृतदेह सोलापूर येथे रेल्वे रुळांवर आढळून आला. शिंदे यांच्या मृत्युमुळे एकच खळबळ उडाली असून, ही हत्या की आत्महत्या याबाबत संशय निर्माण झाला आहे. पोलीस मृत्यूच्या कारणाचा शोध घेत आहेत. ही घटना आज (सोमवार, 8 फेब्रुवारी 2021) सकाळी घडली.

दक्षिण सोलापूर तालुक्यात असलेल्या धोत्री येथील गोकुळ शुगर उद्योगाचे भगवान शिंदे हे अध्यक्ष होते.प्राप्त माहितीनुसार, भगवान शिंदे हे आज पहाटे नेहमीप्रमाणे फिरायला गेले होते. नियमीतपणे ज्या वेळेला ते घरी परततात त्या वेळी ते परतले नाहीत. बराच वेळ उलटूनही ते परत आले नाहीत. त्यामुळे त्यांच्या कुटुंबीयांनी त्यांचा शोध घ्यायला सुरुवात केली. शोध घेऊनही शिंदे यांचा थांगपत्ता लागला नाही. अखेर त्यांच्या कुटुंबीयांनी पोलिसांत माहिती दिली.

दरम्यान, सोलापूरातील मोदी स्मशानभूमी मार्गावर असलेल्या पुलाजवळ एक मृतदेह छिन्नविच्छिन्न अवस्थेत पडल्याची माहिती रेल्वे पोलिसांना प्राप्त झाली. सदर घटनेची माहिती पोलिसांनी शिंदे कुटुंबीयांना दिली. शिंदे कुटुंबीयांनी जाऊन पाहिले असता हा मृतदेह भगवान शिंदे यांचाच असल्याचे पुढे आले.