रेल्वे उड्डाण पुलावरून उडी मारून पोलीस कर्मचाऱ्याचा आत्महत्येचा प्रयत्न

बीड, 19 जानेवारी : बीड जिल्ह्यातील परळी इथं रेल्वे उड्डाणपुलावरून उडी मारुन एका पोलीस कर्मचाऱ्याने आत्महत्येचा प्रयत्न केल्याची खळबळजनक घटना घडली आहे. सुनील घोळवे असं या पोलीस कर्मचाऱ्याचे नाव आहे. या घटनेमुळे परळीत एकच खळबळ उडाली आहे.

पोलिसांनी दिलेल्या माहितीनुसार,  परळी येथील संभाजीनगर पोलीस ठाण्याचे  कर्मचारी सुनील सुंदरराव घोळवे बक्कल क्रमांक 755 यांनी सोमवारी संध्याकाळी 8.15 वाजेच्या सुमारास रेल्वे उड्डाणपुलावरून उडी मारून आत्महत्येचा प्रयत्न केला.

सुनील घोळवे यांनी रेल्वे उड्डाणपुलावर उडी मारून आत्महत्येचा प्रयत्न का केला याचे कारण अद्याप समजू शकले नाही. पोलीस कर्मचारी सुनील घोळवे गंभीररीत्या जखमी झाले असून त्यांना परळीतील एका खाजगी रुग्णालयात उपचारार्थ दाखल करण्यात आले आहे. त्यांच्यावर उपचार सुरू आहे.