भारत बंदला सोलापूर जिल्ह्यातून शंभर टक्के प्रतिसाद

भारत बंदला सोलापूर जिल्ह्यातून शंभर टक्के प्रतिसाद

पंढरपूर, प्रतिनिधी
सोलापूर जिल्ह्यामध्ये हमाल मापाडी पंचायत व इतर संघटनेने पुकारलेल्या भारत बंदला सोलापूर जिल्ह्यातून शंभर टक्के प्रतिसाद मिळाला आहे. दिल्ली येथे सुरू असलेल्या शेतकर्‍यांच्या आंदोलनास सोलापूर जिल्ह्यातील हमाल मापाडी पंचायत व विविध संघटनांच्या आज भारत बंदमध्ये सहभागी होऊन जाहीर पाठिंबा दिला आहे.
यावेळी शेतकरी आंदोलनाच्या 3 कायदे रद्द करण्याच्या मागणीस संपूर्ण पाठिंबा दिला असून केंद्र सरकारने त्वरीत शेतकरी कायदे रद्द करण्यात यावेत. तसेच कृषी उत्पन्न बाजार समित्या दुबळ्या करण्याचे षडयंत्र हाणून पाडा, उत्पादन खर्चाचे दिडपट किमान हमीभावास कायदेशीर संरक्षण द्यावे, सर्व उत्पादनांना हमी भाव देऊन संरक्षण द्यावे, शेतकर्‍यांना अवश्यक तेथे सबसिडी उपलब्ध करून द्यावी, व माथाडी कायद्याची काटेकोरपणे अंमलबजावणी करून राज्य सल्लागार मंडळ आणि जिल्हा माथाडी मंडळाची तात्काळ स्थापना करण्यात यावी अशा घोषणा यावेळी देण्यात आल्या.
सदर मागण्यांचे निवेदन जिल्ह्यातील प्रत्येक कृषी उत्पन्न बाजार समितीमार्फत सहकार व पणनमंत्री बाळासाहेब पाटील यांना देण्यात आले. यामध्ये सोलापूर, बार्शी, करमाळा, पंढरपूर, कुर्डूवाडी, माळशिरस आदी ठिकाणच्या कृषी उत्पन्न बाजार समितीमधील हमाल तोलार मोठ्या संख्येने सहभागी झाले होते. महाराष्ट्र राज्य हमाल मापाडी महामंडळाचे अध्यक्ष डॉ. बाबा आढाव यांच्या सूचनेनुसार जिल्हाध्यक्ष शिवाजी शिंदे यांच्या मार्गदर्शनाखाली सोलापूर जिल्ह्यातील सर्व कृषी उत्पन्न बाजार समितीचे सभापती व सचिवांना सदर मागण्यांचे निवेदन देण्यात आले. यावेळी पंढरपूर येथील कृषी उत्पन्न बाजार समितीचे सचिव कुमार घोडके यांना निवेदन देण्यात आले. यावेळी जिल्हाध्यक्ष शिवाजी शिंदे, जिल्हा सचिव आबाजी शिंदे, अध्यक्ष मारूती बंदपट्टे, देवा गांडुळे, हरिभाऊ कोळी, संतोष सावंत, मधुकर वाघ, राजेंद्र जाधव, भीमा धनवे, अंकुश कदम, शिवानंद पुजारी, नागनाथ खंडागळे, भीमा सिताफळे, सिताराम हिप्परगी, दत्ता मुरूमकर, गफार चांद, पुराणिक महाराज, अ‍ॅड. राहूल सावंत, कमलेश रोडगे, गोरख जगताप, महादेव करडे, ताजोद्दीन शेख, चंद्रकांत मांजरे, सुरेश बागल, बप्पा चव्हाण, लक्ष्मण बागल, लक्ष्मण उपासे आदीसह जिल्ह्यातील कार्यकर्त्यांनी या आंदोलनामध्ये सहभाग घेतला.

दिल्ली येथे चालू असलेले शेतकर्‍यांच्या आंदोलनास महाराष्ट्र राज्य हमाल मापाडी महामंडळ व सोलापूर जिल्हा हमाल मापाडी पंचायतच्या वतीने संपूर्ण पाठिंबा आहे. त्याचप्रमाणे केंद्र सरकारने शेतकरी विरोधी तीन विधायक मंजूर केलेली ताबडतोब रद्द करण्यात यावे अन्यथा याचा परिणाम केंद्र सरकारला भोगावा लागेल.
– शिवाजी शिंदे,

जिल्हाध्यक्ष हमाल मापाडी पंचायत