सिंहगड अभियांत्रिकी महाविद्यालय, पंढरपूर येथे जावा प्रोग्रॅमिंग व पायथॉन प्रशिक्षण यशस्वीरीत्या संपन्न

सिंहगड अभियांत्रिकी महाविद्यालय, पंढरपूर येथे तृतीय वर्षातील अभियांत्रिकी विद्यार्थ्यांसाठी १२ डिसेंबर २०२५ ते २९ डिसेंबर २०२५ या कालावधीत “जावा प्रोग्रॅमिंग व पायथॉन प्रोग्रॅमिंग” या विषयांवर विशेष प्रशिक्षण कार्यक्रमाचे आयोजन करण्यात आले होते. या प्रशिक्षणाचे यशस्वी संचालन श्री. राहुल घोष व श्री. नारायण ठाकरे यांनी केले.
सध्याच्या तंत्रज्ञानप्रधान युगात जावा व पायथॉन प्रोग्रॅमिंग ही कौशल्ये उद्योगक्षेत्रासाठी अत्यंत आवश्यक व मागणी असलेली ठरली आहेत. विशेषतः सॉफ्टवेअर विकास, डेटा अ‍ॅनालिटिक्स, कृत्रिम बुद्धिमत्ता, मशीन लर्निंग, वेब डेव्हलपमेंट व ऑटोमेशन यांसारख्या क्षेत्रांमध्ये पायथॉनचा मोठ्या प्रमाणावर वापर होत आहे. त्यामुळे विद्यार्थ्यांना उद्योगजगतातील अद्ययावत तंत्रज्ञानाशी जोडण्यासाठी या प्रशिक्षणाचे आयोजन करण्यात आले.
या प्रशिक्षणाद्वारे विद्यार्थ्यांना कोअर जावा, अ‍ॅडव्हान्सड जावा, विविध फ्रेमवर्क्स, तसेच पायथॉन प्रोग्रॅमिंगमधील मूलभूत संकल्पना, प्रोग्रॅमिंग लॉजिक, रिअल टाइम अ‍ॅप्लिकेशन्स व प्रात्यक्षिके यांचे सखोल ज्ञान देण्यात आले. हे प्रशिक्षण क्यूस्पायडर कंपनीच्या सहकार्याने राबविण्यात आले. तृतीय वर्षातील २३०विद्यार्थ्यांनी या प्रशिक्षणामध्ये सहभाग नोंदविला.
या प्रशिक्षणामुळे विद्यार्थ्यांचे तांत्रिक व व्यावसायिक कौशल्य अधिक सक्षम झाले असून त्यांना कॅम्पस प्लेसमेंटसाठी आत्मविश्वास मिळाला आहे. सोलापूर जिल्ह्यात अभियांत्रिकी विद्यार्थ्यांसाठी कॉग्निझंट, एलटीआय माईंडट्री यांसारख्या नामांकित कंपन्या कॅम्पस प्लेसमेंटसाठी केवळ सिंहगड महाविद्यालयातील विद्यार्थ्यांसाठीच सप्टेंबर महिन्यात उपलब्ध झाल्या आहेत. या पार्श्वभूमीवर जावा व पायथॉन प्रोग्रॅमिंगचे प्रशिक्षण विद्यार्थ्यांच्या निवडीसाठी अत्यंत उपयुक्त ठरेल, अशी आशा महाविद्यालयाचे प्राचार्य डॉ. कैलाश करांडे यांनी व्यक्त केली.
हे प्रशिक्षण यशस्वी होण्यासाठी महाविद्यालयातील शिक्षक व शिक्षकेतर कर्मचाऱ्यांनी विशेष परिश्रम घेतले.