पेन्शन दिली नाही म्हणून सूनेचं वाढलं टेन्शन; बापाच्या साथीनं सासूला संपवलं

बिहारमधील नालंदामध्ये पेन्शनचे पैसे दिले नाही म्हणून सुनेनं सासूची हत्या केल्याची घटना घडली आहे. तिने तिच्या वडिलांसोबत मिळून हा खून केलाय. याप्रकरणी पोलिसांनी दोघांनाही अटक केली आहे. बिहारमधील नालंदा जिल्ह्यातील मुरौरा या गावात ही घटना घडली आहे. यानंतर याप्रकरणी मृत महिलेच्या मुलाने पत्नीविरुद्ध पोलीस ठाण्यात गुन्हा दाखल केला होता. यानंतर पोलिसांनी आरोपी महिलेला अटक केली.

विमला शर्मा (५९) असं मृत महिलेचं नाव आहे. आरोपी सून रुबी कुमारीला अटक करण्यात आली आहे. याप्रकरणी महिलेचा मुलगा कौशल कुमार याने पोलीस ठाण्यात गुन्हा दाखल केला होता. त्यानंतर पोलिसांनी याप्रकरणी कारवाई केली आहे.

या महिलेच्या पतीचं काही वर्षांपूर्वी निधन झाल्याचं सांगण्यात येतंय. तो सरकारी कर्मचारी होता. यानंतर महिलेला पतीच्या पेन्शनचे पैसे मिळत होते. महिलेचा तिच्या सुनेकडून छळ होत होता. तिला खाण्यापिण्याचीही परवानगी नव्हती. महिलेचं तिच्या सुनेशी अनेकदा भांडण होत असे. सुनेला पेन्शनचे सर्व पैसे स्वतःकडे ठेवायचे होते. यामुळे ती सासूला त्रास देत असे. महिलेची हत्या तिच्या सुनेनेच केली, असं शेजाऱ्यांनीही सांगितलं आहे. आईची हत्या पत्नीनेच केल्याचं मृत महिलेच्या मुलाने पोलिसांना सांगितले आहे.