सुट्टीवर आलेल्या जवानाचा सख्ख्या भावानेच घेतला बळी, धक्कादायक कारण समोर

पैशाचा वाद टोकाला गेल्याने सख्ख्या भावाने आपल्या सैनिक असलेल्या मोठ्या भावाला बेदम मारहाण केली. या मारहाणीत गंभीर जखमी झालेल्या जवानाचा मृत्यू झाला आहे. ही धक्कादायक घटना बीडच्या आष्टी तालुक्यातील वाघळूज येथे उघडकीस आली. या घटनेनंतर परिसरात खळबळ उडाली होती.

याप्रकरणी खूनाचा गुन्हा दाखल झाला आहे. प्रवीण विनायक पवार असे मयताचे नाव आहे. प्रवीण हे झारखंड येथे सीआरपीएफमध्ये नोकरीला असून मागील पंधरा दिवसांपासून सुट्टीवर गावी आले होते. काल प्रवीण व त्यांचा लहान भाऊ विनोद यांच्यात पैशाच्या देवाणघेवाणीवरून वाद झाला. यात प्रवीणला बेदम मारहाण करण्यात आली. यात ते गंभीर जखमी झाले. त्यामुळे त्यांना तात्काळ अहमदनगर येथील रूग्णालयात उपचारासाठी दाखल करण्यात आले. परंतु, मारहाणीत जखम झाल्याने अतिरक्तस्त्राव होऊन उपचरादरम्यान पहाटेच्या सुमारास मृत्यू झाला.

या घटनेची माहिती मिळताच अंभोरा पोलिसांनी रूग्णालयात धाव घेतली. तसेच घटनास्थळाचाही पंचनामा केला. याप्रकरणी प्रवीण यांच्या पत्नी सीमा पवार यांच्या फिर्यादीवरून सासू झुंबरबाई पवार, सासरे विनायक पवार, भावजयी सोनाली पवार, दीर विनोद पवार यांच्या विरोधात अंभोरा पोलिस ठाण्यात खूनाचा गुन्हा दाखल करण्यात आला आहे. यातील विनोद पवार याला पोलिसांनी ताब्यात घेतले आहे. तपास उपनिरीक्षक आदिनाथ भडके करीत आहेत.