तरुणीने लग्नाला दिला नकार…तरुणाने सात वाहने पेटवली

एकतर्फी प्रेमातून एका तरुणाने तब्बल सात वाहने पेटवून दिल्याची खळबळजनक घटना नाशिकच्या काठे गल्ली परिसरात घडली आहे. यात संबंधित तरुणीच्या दोन गाड्या आणि इतर पाच अशा सात वाहनांची जाळपोळ करण्यात आली असून सर्व वाहने जळून खाक झाली आहेत. या घटनेनंतर भद्रकाली पोलीस ठाण्यात गुन्हा दाखल करण्यात आल्यानंतर पोलिसांनी अवघ्या काही तासात दोघांना अटक केली आहे. सुमित, विकी अशी त्यांची नावे आहेत.

फिर्यादी तरुणी आणि संशयित सुमित पगारेची ओळख आहे. सुमितने फिर्यादी तरुणीकडे सातत्याने त्याच्याशी लग्न करण्याचा तगादा लावला होता. मात्र तरुणीने वेळोवेळी त्याला नकार दिला होता. संबंधित तरुणीने यावेळीही त्याला नकार दिला. त्यामुळे सुमितला राग अनावर झाला. संतापलेल्या सुमितने त्याचा साथीदार विकीच्या मदतीने सात वाहने पेटवून दिली. यामध्ये तरुणीच्या दुचाकीसह अन्य दुचाकी, चारचाकी वाहन आणि रिक्षाचा समावेश आहे. ही सर्व वाहने जळून खाक झाली आहेत.

स्थानिकांनी तातडीने पाण्याचा मारा करत आग विझवण्याचा प्रयत्न केला. मात्र तोपर्यंत बहुतांश वाहने जळून राख झाली होती. या घटनेने परिसरात एकच खळबळ माजली आहे. घटनेनंतर घाबरलेल्या तरुणीने पोलीस ठाणे गाठले आणि तक्रार दाखल केली. त्यानंतर पोलिसांनी काही तासातच या दोघांना बेड्या ठोकल्या असून अधिक तपास सुरू आहे.