खेळण्याच्या वयात 11 वर्षीय मुलीच्या गळ्यात बांधलं मंगळसूत्र; 13 वर्षाचा नवरदेव, आता..

लग्न हा प्रत्येकाच्या आयुष्यातील अतिशय महत्त्वाचा आणि आनंदाचा क्षण असतो. प्रत्येक व्यक्ती या दिवसाची आतुरतेनं वाट पाहात असतो. मात्र, काही वेळा लग्नाच्या अशा काही घटना समोर येतात, ज्या हादरवून टाकतात. अशीच एक घटना बीडमधून समोर आली आहे. बालविवाहाचा धक्कादायक प्रकार बीडच्या आष्टी तालुक्यात उघडकीस आला आहे.

यात 11 वर्षांची नवरी अन् 13 वर्षांचा नवरदेव होता. या घटनेमुळे बीड जिल्ह्यातील बालविवाहाचं वास्तव समोर आलं आहे, जे चिंता करायला लावणारं आहे. बालविवाह रोखण्यासाठी सरकारने कडक कायदे केले आहेत. मात्र, कायद्याला झुगारून बालविवाह लावून देत असल्याच्या घटना समोर येत आहे.

आष्टी शहरापासून अवघ्या 8 किलोमीटर अंतरावर असलेल्या एका गावातील ही घटना आहे. 19 ऑक्टोबर रोजी सायंकाळी सहा वाजेच्या दरम्यान आईने 11 वर्षांच्या मुलीचा विवाह करमाळा तालुक्यातील देवळाली येथील 13 वर्षांच्या मुलासोबत हळदी समारंभात लावून दिला.

या प्रकरणात ग्रामसेवक बापू कुंडलिक नेटके यांच्या फि्यादीवरून सुशीला एकनाथ पवार, गौतम रघुनाथ काळे, माया गौतम काळे, राधा गौतम काळे यांच्यावर बालविवाह प्रतिबंधक कलमानुसार गुन्हा नोंद करण्यात आला आहे. मुलीच्या आईने विवाह लावून दिल्यानंतर बापाने या प्रकाराला वाचा फोडली.