शिवमंदिरात पहाटे कटर मशीनचा आवाज घुमला, तरुणानं स्वत:ची मान कापली; कारण समजताच सारेच सुन्न

ललितपूर जिल्ह्याच्या रघुनाथपुरा परिसरात ही घटना घडली. इथे राहणाऱ्या पलटूराम कुशवाह यांचा ३० वर्षीय मुलगा दीपक मजुरी करुन कुटुंबाचं पोट भरतो. दीपकला दोन मुलं आहेत. दीपक भगवान शंकराचा भक्त असल्याचं पलटूराम यांनी सांगितलं. ‘दीपक दररोज भगवान शंकराची आराधना करत होता. तो सकाळ-संध्याकाळी शंकराची पूजा करायचा. माझी मान कापून भगवान शंकराला प्रसन्न करणार, असं तो गेल्या काही महिन्यांपासून म्हणत होता. मी त्याला अनेकदा समजावलं. पण तो ऐकायला तयार नव्हता,’ अशी माहिती पलटूराम यांनी दिली.

‘दीपक एका वहीत भगवान शंकराशी संबंधित मंत्र आणि गोष्टी लिहायचा. त्यात एका ठिकाणी भोलेनाथाला मस्तक अर्पण करणार असल्याचा उल्लेख होता. आज पहाटे ४ वाजता तो गावातील शिवमंदिरात गेला. तिथे त्यानं भोलेनाथाच्या चबुतऱ्यासमोर झाड कापण्याच्या मशीननं मान कापून घेतली. मशीनचा आवाज घुमला. ग्रामस्थांनी आवाज ऐकून मंदिरात धाव घेतली. तेव्हा दीपक रक्ताच्या थारोळ्यात पडला होता. घटनेची माहिती मिळताच आम्ही मंदिरात पोहोचलो. दीपकला झाशी रुग्णालयात दाखल केलं. तिथे त्याच्यावर उपचार सुरू आहेत,’ असा घटनाक्रम पलटूराम यांनी कथन केला.