शेतात बायकोवर वार; शिर हातात घेऊन गावात आला; दारात ठेवून कित्येक तास बसून राहिला

पतीनं पत्नीचं शिर धडावेगळं केल्याची धक्कादायक घटना ओदिशातील गजपती जिल्ह्यात घडली आहे. दाम्पत्य सारा गावाजवळ असलेल्या शेतात गेले होते. तेव्हा तिथे त्यांच्यात काही कारणावरुन वाद झाला. वाद विकोपाला गेल्यानंतर पतीनं पत्नीची हत्या केली. तिचं शिर धडावेगळं केलं. पत्नीचं शिर घेऊन पती गावात पोहोचला. उर्मिला कारजी असं मृत महिलेचं नाव असून चंद्रशेखर कारजी असं आरोपी पतीचं नाव आहे. पोलिसांनी आरोपी पतीला अटक केली आहे. हत्या प्रकरणाचा तपास पोलीस करत आहेत.

गुरुवारी सकाळच्या सुमारास उर्मिला आणि चंद्रशेखर त्यांच्या शेतात गेले होते. तिथे त्यांच्यात वाद झाला. या वादाचं नेमकं कारण स्पष्ट झालेलं नाही. भांडण वाढत गेल्यानं चंद्रशेखर संतापला. त्याचा स्वत:वरील संयम सुटला. हातात असलेल्या धारदार कुऱ्हाडीनं त्यानं उर्मिलाच्या मानेवर वार केले. पत्नीचं शिर धडावेगळं केल्यानंतरच तो शांत बसला.

पत्नीचं शिर हातात घेऊन चंद्रशेखर गावात आला. त्याला पाहून ग्रामस्थ भयभीत झाले. चंद्रेशेखरनं घर गाठलं आणि पत्नीचं शिर दाराच्या समोर ठेवलं. त्याच्या शेजारीच चंद्रशेखर अतिशय शांतपणे बसला. हा प्रकार पाहून ग्रामस्थांची पाचावर धारण बसली. घाबरलेल्या गावकऱ्यांनी झालेल्या प्रकाराची माहिती पोलिसांना दिली. पोलिसांनी तातडीनं गाव गाठलं. पोलीस चंद्रशेखरच्या घराजवळ पोहोचले. चंद्रशेखर अतिशय शांतपणे पत्नीच्या शिराजवळ बसलेला त्यांना दिसला.

पोलिसांनी चंद्रशेखरला ताब्यात घेतलं. त्याची चौकशी केली. मीच पत्नीला संपवलं, अशी कबुली त्यानं दिली. यानंतर पोलिसांनी चंद्रशेखरला अटक केली. ‘पत्नीची हत्या केला. तिचं शिर धडावेगळं केलं. धड शेतात टाकून शिर घरी आणलं,’ अशी माहिती त्यानं दिली. यानंतर पोलिसांनी शेतात जाऊन धड ताब्यात घेऊन ते शवविच्छेदनासाठी पाठवलं.