वडिलांच्या वर्षश्राद्धालाच माझा अखेरचा श्वास; पोराने शपथ घेतली, तो दिवस उगवला अन्…

जिल्ह्यातील मुखेड शहरात शुक्रवारी एक मन हेलावून टाकणारी घटना घडली. वडिलांच्या वर्षश्राद्धालाच मुलाने आत्महत्या करत आपलं आयुष्य संपवलं. परमेश्वर उर्फ अमोल महाले (वय २८) असं आत्महत्या केलेल्या तरुणाचं नाव आहे.

परेमश्वर उर्फ अमोल महाळे हा मुखेड शहरातील वेताळ गल्ली येथे राहत होता. वर्षभरापूर्वी त्याचे वडील नागनाथ धोंडिबा महाळे यांचं निधन झालं होतं. वडिलांच्या निधनाने परमेश्वर हा दुःखात होता. तसेच, आपल्याला वडिलांची नेहमी आठवण येते त्यामुळे “वडिलांच्या वर्षश्राद्धालाच मी मरणार”, असं तो नेहमी लोकांना सांगायचा असं गावाकऱ्यांनी सांगितलं. मात्र, त्याच्या बोलण्याकडे लोकांनी दुर्लक्ष केलं. कुटुंबियांनी देखील त्याचे बोलणे जास्त मनावर घेतलं नाही.

शुक्रवारी नागनाथ महाळे यांची वर्षश्राद्ध होतं. घरात वर्षश्राद्धाचा कार्यक्रम सुरु होता. यावेळी परमेश्वर हा बाहेर जातो असं सांगून घराबाहेर पडला. मात्र, थोड्या वेळानंतर त्याने घराजवळ असलेल्या झाडाला गळफास घेऊन आपल्या आयुष्याची दोर कापली. गल्लीतील काही नागरिकांना परमेश्वरचा मृतदेह झाडाला लटकेल्या अवस्थेत आढळून आला. घरात वर्षश्राद्धाचा कर्यक्रम सुरु असतानाच परमेश्वरने आपल्या वडिलांच्या आठवणीत आत्महत्या केल्याने सर्वांना धक्का बसला.

एक वर्षापूर्वी पतीचं निधन आणि त्यानंतर पतीच्या वर्षश्राद्धाच्या दिवशीच मुलाचा झाडाला लटकलेल्या अवस्थेत पाहून आईला मोठा धक्का बसला आहे. या घटनेनं मुखेड शहरात हळहळ व्यक्त होतं आहे. दरम्यान, घटनेची माहिती मुखेड पोलिसांना देण्यात आली, त्यानंतर पोलिसांनी घटनास्थळी येऊन पंचनामा करुन आकस्मिक मृत्यूची नोंद केली आहे.