पाऊस आल्याने ऑटोत बसला, चालकाकडून शिवीगाळ, राग आल्याने झोपेतच दगड घालून संपवलं

सीताबर्डी पोलीस ठाण्याच्या हनुमान गली येथील गुजरात लॉजसमोर शुक्रवारी सकाळी एका व्यक्तीचा मृतदेह सापडल्याची माहिती पोलिसांना मिळाली. पोलिसांनी घटनास्थळी पोहचून मृतदेहाची तपासणी केली असता ऑटोचालक राजकुमार यादव असं त्याचे नाव असल्याचे समोर आले. अज्ञात आरोपीने त्याची दगडाने ठेचून निर्घृण हत्या केली होती. परिसरात बसवण्यात आलेल्या सीसीटीव्ही कॅमेऱ्यांच्या मदतीने काही मिनिटांतच पोलिसांनी हत्या करणाऱ्या आरोपीची ओळख पटवली.

साहिल अजय राऊत (वय २०) असं आरोपीचं नाव असून हा आनंद नगरचा रहिवासी आहे. वास्तविक साहिलचे वडीलही ऑटोचालक आहेत. घरातील मोबाईल नेटवर्क नीट काम करत नसल्याने तो अनेकदा वायफाय वापरून मोबाईल फोनवर डाऊनलोडींग करण्यासाठी या रस्त्यावर येत असे. घटनेच्या रात्रीही तो रस्त्यावरील ओट्यावर बसून मोबाईलमध्ये डाउनलोडींग करत होता. त्याचवेळी पाऊस सुरू झाला आणि तो तिथे उभ्या असलेल्या ऑटोमध्ये जाऊन बसला.

ऑटोचालक आपली ऑटो बाजूला लावून जवळच्या ओट्यावर झोपला होता. त्याचवेळी ऑटोचालकाला जाग आली आणि त्याने तरुणाला शिवीगाळ करत खडसावले. घाणेरड्या शिव्या ऐकून साहिल दुखावला आणि त्याने रस्त्यावरून एक दगड उचलून राजकुमारच्या डोक्यावर मारला. राजकुमार मेला नाही हे त्याला कळले. काही वेळाने मागे फिरल्यानंतर पकडले जाऊ या भीतीने साहिलने पुन्हा दगड उचलला आणि राजकुमाराची निर्घृण हत्या केली.

घटना घडल्यानंतर तो पकडला जाईल या भीतीने तरुणाने मोर्शीजवळील कोळवीर गावात मावशीच्या घरी पळ काढला होता. ज्याला काही तासातच गुन्हे शाखा युनिट २ च्या पथकाने अटक केली. विशेष बाब म्हणजे आरोपी साहिल काही दिवसांपूर्वी भंडारा येथे झालेल्या पोलीस भरतीतही सहभागी झाला होता.