चिंचवडमध्ये हायव्होल्टेज ड्रामा, मतदानापूर्वी राष्ट्रवादी-ठाकरे गटाच्या कार्यकर्त्यांना पोलिसांनी उचललं

पिंपरी – चिंचवड पोलिसांनी कोणतेही कारण नसताना शनिवारी (२५ फेब्रुवारी) रात्री उद्धव ठाकरे गटाच्या सैनिकांची आणि राष्ट्रवादी काँग्रेसच्या काही कार्यकर्त्यांची धरपकड केली. या कार्यकर्त्यांना कोणताही गुन्हा नसताना दोन ते चार तास पोलिस ठाण्यात बसवून ठेवले. निवडणुकीचे काम करता येऊ नये, यासाठीच पोलिसांनी सत्ताधारी पक्षाच्या सांगण्यावरून आम्हाला डांबून ठेवल्याचा आरोप शिवसेना, राष्ट्रवादी काँग्रेसचे कार्यकर्ते करत आहेत.

चिंचवड विधानसभेच्या पोटनिडणुकीचे वातावरण चांगलेच तापले आहे. भाजप आणि महविकास आघाडी अशी थेट लढत रंगणार असल्याचे चित्र सध्या दिसत आहे. भाजपच्या उमेदवार अश्विनी जगताप या सहानभुती तसेच विकासाच्या मुद्द्यावर लढत आहे. तर, महाविकास आघाडीचे उमेदवार नाना काटे यांनी विकास तसेच महापालिकेत सुरू असणाऱ्या भ्रष्टाचाराच्या मुद्द्यावर निवडणूक लढवत आहेत. दोन्हीही उमेदवार तुल्यबळ असल्याने गेले काही दिवस प्रचारातही रंगत आल्याचे पाहायला मिळाले. दोन्ही पक्षांनी प्रचारात मोठा जोर लावला होता. भाजपने मुख्यमंत्री, उपमुख्यमंत्री, मंत्री, आमदार, खासदार यांची फौजच तैनात केली होती. तर, राष्ट्रवादीने विरोधी पक्ष नेते अजित पवार, उद्धव बाळासाहेब ठाकरे गताचे नेते आदित्य ठाकरे आदींसह प्रचार केला.

दरम्यान, प्रचाराची सांगता झाल्यानंतर शुक्रवारी रात्री कमळाची चित्रे असलेल्या स्लीप आणि काही लाखांची रक्कम वाटप करताना लोक काही कार्यकर्ते सापडले. या कार्यकर्त्यांवर गुन्हा दाखल करण्यात आला आहे. मात्र, त्यानंतर या कार्यकर्त्यांना ज्यांनी पकडून दिले त्यांनाही पोलिसांनी कोणतेही कारण नसताना पकडले. काही कार्यकर्त्यांना तर घरी जाऊन पकडले. त्यानंतर त्यांनां चिंचवड तसेच इतर पोलिस ठाण्यात बसवून ठेवले. राष्ट्रवादी आणि शिवसेना पक्षाचे कार्यकर्त्यांना पकडल्याचे कळतं आहे.

निवडणुकीत निवडणूक आयोगाच्या सूचनेप्रमाणे पोलिस यंत्रणा काम करते. आयोगाकडे तक्रार गेली असेल तर त्यानुसार पोलिसांनी काही कार्यकर्त्यांवर कारवाई केली असेल. नक्की काय प्रकार झाला आहे, याची माहिती घेण्यात येईल. तसेच पोलिस कोणाच्याही दबावाखाली काम करत नाही.