नादुरुस्त बॉयलर बेल्ट अचानक सुरु, कामगार आत ओढला गेला, पट्ट्यात अडकून जीव गमावला

बॉयलरच्या बेल्टमध्ये अडकून कामगाराचा दुर्दैवी मृत्यू झाला. ही घटना बीड जिल्ह्यात माजलगाव तालुक्यातील जय महेश कारखान्यात घडली. काल रात्री साडेआठ वाजताच्या सुमारास हा प्रकार घडला असून या घटनेची माहिती मिळताच कारखान्यातील इतर कर्मचारी आणि पोलीस प्रशासन तात्काळ घटनास्थळी दाखल झाले होते.

घटनेविषयी अधिक माहिती अशी, की कल्याण गणपती टोले (वय वर्ष ४०) हा आनंदगाव येथील रहिवासी होता. डोले तालुक्यातील पवारवाडी येथील जय महेश कारखाना म्हणजेच शुगर इंडस्ट्रीमध्ये तो काम करत होता.

गेल्या काही दिवसांपासून कारखान्यातील काही मशिनरींची दुरुस्ती सुरु होती. नादुरुस्त मशिनरी व्यवस्थित करण्यासाठी रात्रीच्या वेळेला हे काम चालू होतं. मात्र रात्री साडेआठ वाजताच्या सुमारास कल्याण टोले हा बॉयलर जवळ काम करत होता. यावेळेस अचानक मशीनचा पट्टा चालू झाल्याने कल्याण या मशिनच्या पट्ट्याकडे ओढला गेला. या पट्ट्यात अडकून त्याचा दुर्दैवी मृत्यू झाला.

घटना आजूबाजूच्या कर्मचाऱ्यांना कळतात मशीन तात्काळ बंद करण्यात आली. त्यानंतर कल्याणला येथील प्राथमिक उपचारासाठी दवाखान्यात पाठवण्यात आलं, मात्र त्याआधीच त्याचा मृत्यू झाला होता.

या घटनेनंतर कर्मचाऱ्यांनी पोलीस प्रशासनाला तात्काळ फोन करून या घटनेची माहिती सांगितली, मात्र या घटनेने कारखाना परिसरात एकच खळबळ उडाली असून सर्वत्र हळहळ व्यक्त केली जात आहे.