ठाकरे गटाचे मशाल चिन्हही येणार धोक्यात?

शिवसेना आणि धनुष्यबाण चिन्हाबाबत निवडणूक आयोगाने शुक्रवारी (ता. १७) महत्त्वाचा निर्णय दिला आहे. शिवसेना हे पक्षाचं नाव आणि धनुष्यबाण चिन्ह निवडणूक आयोगाकडून एकनाथ शिंदे यांच्या पक्षाला देण्यात आले आहे.

ठाकरे गटासाठी मोठा धक्का मानला जात आहे. निवडणूक आयोगाने धनुष्यबाण हे चिन्ह शिंदे गटाला दिल्यामुळे आता शिवसेना उद्धव बाळासाहेब ठाकरे गटाला मशाल या चिन्हाचा वापर करावा लागणार आहे. पण, शिवसेना उद्धव बाळासाहेब ठाकरे पक्षाला देण्यात आलेल्या मशाल चिन्हावर समता पक्षाने दावा केला आहे.

शिवसेना उद्धव बाळासाहेब ठाकरे गटाला देण्यात आलेले मशाल चिन्ह गोठवण्यात यावे, अशी मागणी समता पक्षाच्या वतीने करण्यात आली आहे. आज (शनिवार) सकाळी 10 वाजता समता पक्षाचे शिष्टमंडळ याच पार्श्वभूमीवर केंद्रीय निवडणूक आयोगात जाणार आहे. समता पक्षाचे अध्यक्ष उदय मण्डल यांच्या नेतृत्वात हे शिष्टमंडळ आयुक्तांची भेट घेणार आहे.

दरम्यान, एकनाथ शिंदे यांनी शिवसेनेतून उठाव केल्यानंतर शिवसेनेत ठाकरे गट आणि शिंदे गट असे दोन गट पडले होते. दोन्ही गटाकडून शिवसेना आणि धनुष्यबाण या चिन्हावर दावा करण्यात आला होता. दोन्ही गटाकडून दावा करण्यात आल्याने निवडणूक आयोगानं अंतिम निकाल येईलपर्यंत पक्षाचे नाव आणि धनुष्यबाण चिन्ह गोठवण्याचा निर्णय घेतला. धनुष्यबाण चिन्ह गोठवल्यानंतर ठाकरे गटाला मशाल हे चिन्ह देण्यात आले होते.

पण, यानंतर शुक्रवारी (ता. १७) निवडणूक आयोगाने निर्णय दिला. निवडणूक आयोगाने धनुष्यबाण हे चिन्ह आणि शिवसेना हे नाव शिंदे गटाला दिले आहे. त्यामुळे आता ठाकरे गटाला मशाल याच चिन्हाचा वापर करावा लागणार आहे. मात्र आता मशाल या चिन्हावर देखील समता पक्षाने दावा केला आहे. आज सकाळी दहा वाजता याच पार्श्वभूमीवर समता पक्षाचे शिष्टमंडळ निवडणूक आयोगाकडे जाणार आहे.