आई-वडील कामावर गेल्यानंतर भयंकर घटना; ३ वर्षीय मुलगी घरातून गायब, नंतर आढळला मृतदेह

भिवंडीमध्ये तीन वर्षांच्या मुलीची बलात्कारानंतर हत्या करण्यात आल्याची घटना ताजी असतानाच, आणखी एका तीन वर्षांच्या मुलीच्या हत्येने भिवंडी हादरली. हत्येचा हा प्रकार बुधवारी सकाळी समोर आला असून या मुलीचा मृतदेह येथील चाळीतील पहिल्या मजल्यावरील खोलीमध्ये मिळाला. या प्रकरणी शांतीनगर पोलिस ठाण्यात गुन्हा दाखल झाला असून पोलिसांची विविध पथके आरोपीचा शोध घेत आहेत. शवविच्छेदन अहवालानंतर तिच्या मृत्यूचे नेमके कारण कळेल, असे एका पोलिस अधिकाऱ्याने सांगितले.

हत्या झालेल्या ही अल्पवयीन मुलगी तीन भावंडांमध्ये सर्वांत लहान होती. मंगळवारी सकाळी तिचे आई-वडील कामावर गेले होते. दुपारी १ वाजता आई घरी आल्यानंतर लहान मुलगी कुठे दिसली नाही. तिचा सर्वत्र शोध घेऊनही न सापडल्याने अखेर रात्री तिच्या पालकांनी शांतीनगर पोलिस ठाण्यात धाव घेत मुलगी हरवल्याची तक्रार दिली. पोलिसांनी तत्काळ अपहरणाचा गुन्हा दाखल करत मुलीचा शोध सुरू केला. पहाट झाली तरी मुलीचा शोध सुरू होता.

बुधवारी सकाळी पोलिस ठाण्याच्या हद्दीतील चाळीतील पहिल्या मजल्यावरील खोलीमध्ये या मुलीचा मृतदेह आढळून आला. हा मृतदेह पोलिसांनी शवविच्छेदनासाठी मुंबईतील जे. जे. रुग्णालयात पाठवला असून तिच्या हत्येप्रकरणी अपहरण, हत्या, पोस्को आदी कलमांतर्गत गुन्हा दाखल करण्यात आला आहे. अद्याप आरोपीचा शोध लागलेला नसल्याने या मुलीची हत्या नेमकी कोणी केली याचा उलगडा झालेला नाही. पोलिसांची विविध पथके आरोपीचा कसून शोध घेत आहेत.

तीनच दिवसांपूर्वी भिवंडीमध्ये तीन वर्षांच्या मुलीचे अगोदर अपहरण करण्यात आले. नंतर तिची बलात्कार करून हत्या करण्यात आल्याची घटना समोर आली होती. या गुन्ह्यात पोलिसांनी आरोपीला अटक केली असली तरी भिवंडीमध्ये आणखी एका तीन वर्षांच्या मुलीच्या हत्येने खळबळ उडाली आहे.