पप्पा-मम्मी मला माफ करा, काँग्रेस आमदाराच्या बंगल्यावर विद्यार्थ्याने आयुष्य संपवलं; कारण…

मध्य प्रदेशची राजधानी भोपाळ येथील काँग्रेस आमदार ओंकार मरकाम यांच्या बंगल्यावर एका विद्यार्थ्याने गळफास घेऊन आत्महत्या केल्याची धक्कादायक घटना घडली आहे. हा विद्यार्थी कॅन्सरने त्रस्त असून त्याच्यावर अभ्यासासोबतच आमदार निवासात उपचार सुरू होते.

माहिती मिळताच पोलिसांनी घटनास्थळ गाठून मृतदेह ताब्यात घेऊन पोस्टमॉर्टमसाठी पाठवला. मृतदेहाजवळून पोलिसांना सुसाइड नोट सापडली आहे. यामध्ये वडिलांना उद्देशून विद्यार्थ्याने लिहिले आहे की, ‘पप्पा माझ्या मित्रांना सांगा की आता तीरथ नाही राहिला.’ पोलीस सध्या या प्रकरणाचा तपास करत आहेत.

पोलिसांनी दिलेल्या माहितीनुसार, रविवारी रात्री उशिरा ही घटना घडली. विद्यार्थी तीरथ हा सुमारे चार वर्षांपासून श्यामला हिल्स येथील आमदारांच्या शासकीय निवासस्थानी राहत होता. गळफास घेण्यापूर्वी त्याने सुसाईड नोटमध्ये आत्महत्येचे कारण आजारपण असल्याचं सांगितले आहे.

सुसाईड नोटमध्ये तीरथने आई-वडील, काका, काकू आणि आजी-आजोबांची माफी मागताना लिहिले आहे की, त्यांनी आपल्यासाठी खूप काही केले. पण, तोच त्यांना नीट समजू शकला नाही. पोलिसांनी या प्रकरणाचा तपास सुरू केला आहे. श्यामला हिल्स पोलीस ठाण्याचे प्रभारी उमेश यादव यांनी सांगितले की, मृतदेहाचे पोस्टमार्टम करून तो नातेवाईकांच्या ताब्यात देण्यात आला आहे. याप्रकरणी पोलीस तपास करत आहेत.