सरकारी नोकऱ्यांमध्येही स्वेरीचा डंका
पंढरपूर: गोपाळपूर (ता. पंढरपूर) येथील श्री विठ्ठल एज्युकेशन अँड रिसर्च इन्स्टिट्यूट संचलित अभियांत्रिकी महाविद्यालयाच्या मेकॅनिकल इंजिनिअरिंग विभागाचे माजी विद्यार्थी विशाल विष्णू भगरे यांची ‘असिस्टंट मोटर व्हेईकल इन्स्पेक्टर’ पदी नुकतीच निवड करण्यात आली आहे. या पदासाठी महाराष्ट्र शासनाकडून सन २०२१ मध्ये परीक्षा घेण्यात आलेली होती. या परीक्षेचा निकाल गेल्या महिन्यात लागला असून सदर परीक्षेत ते महाराष्ट्रात बाराव्या क्रमांकाने उत्तीर्ण झाले आहेत. महाराष्ट्र व केंद्र शासनाकडून घेण्यात आलेल्या विविध स्पर्धा परीक्षांमध्ये स्वेरी अभियांत्रिकीतील मेकॅनिकल इंजिनिअरिंगच्या आतापर्यंत सुमारे २० तर सिव्हील इंजिनिअरिंग विभागाच्या सुमारे ६५ विद्यार्थ्यांची सरकारी नोकऱ्यांमध्ये निवड झालेली आहे.
विशाल भगरे यांचे प्राथमिक शिक्षण जिल्हा परिषद शाळा वासूद अकोला येथे तर माध्यमिक व उच्च माध्यमिक शिक्षण जवाहर नवोदय विद्यालय पोखरापूर, (ता. मोहोळ) येथे झाले. विज्ञान शाखेतून बारावी उत्तीर्ण झाल्यानंतर त्यांनी स्वेरीज कॉलेज ऑफ इंजिनिअरिंग, पंढरपूर येथे मेकॅनिकल इंजिनिअरिंग विभागात प्रवेश घेण्याचे अगोदरच निश्चित केलेले होते. त्याप्रमाणे त्यांनी स्वेरीतच प्रवेश मिळविला. शिक्षणासाठी तब्बल चार वर्षे स्वेरीच्या वसतिगृहात राहून अभ्यास सुरू केला. पदवीच्या चारही वर्षांमध्ये त्यांनी विद्यापीठाच्या गुणवत्ता यादीत स्थान मिळवले. अभियांत्रिकीच्या अंतिम वर्षात त्यांचा विद्यापीठात पाचवा क्रमांक आला होता. स्पर्धा परीक्षा मार्गदर्शन वर्गाद्वारे त्यांनी स्पर्धा परीक्षेत यश कसे मिळवायचे आणि त्यासाठी कसे परिश्रम करायचे याची माहिती घेवून अभ्यास सुरु केला. अभियांत्रिकीची पदवी परीक्षा उत्तीर्ण झाल्यानंतर यांनी महाराष्ट्र शासनाच्या विविध स्पर्धा परीक्षा देण्याचे ठरवले. त्यांचे वडील शिक्षक असून आई गृहिणी आहेत. संस्थेचे संस्थापक सचिव व अभियांत्रिकी महाविद्यालयाचे प्राचार्य डॉ. बी.पी रोंगे व मेकॅनिकल इंजिनिअरिंग विभागातील सर्व प्राध्यापकांचे बहुमोल मार्गदर्शन लाभले. स्वेरीमध्ये ‘गेट’ चे उत्कृष्ट मार्गदर्शन केले जाते. त्यामुळे इंजिनीअरिंगचे शिक्षण घेत असतानाच त्यांनी उत्तम गुण मिळवून गेट परीक्षेत देखील यश संपादन केले. त्यांच्या या यशाबद्दल स्वेरीच्या अभियांत्रिकी महाविद्यालयाचे शैक्षणिक अधिष्ठाता डॉ. प्रशांत पवार यांच्या हस्ते त्यांचा सत्कार करण्यात आला. यावेळी स्वेरीचे कॅम्पस इन्चार्ज प्रा.एम. एम. पवार, प्रशासन अधिष्ठाता डॉ. मिलिंद कुलकर्णी, संशोधन व विकास अधिष्ठाता डॉ. रणजीत गिड्डे, प्रा. बी. डी. गायकवाड व प्रा. एस.आर. गवळी हे उपस्थित होते. सत्काराला उत्तर देताना विशाल भगरे म्हणाले की, ‘स्वेरीत असणारे वैयक्तिक मार्गदर्शन, एकूण शिक्षण संस्कृती, गेट या परीक्षेबाबतचे ट्रेनिंग आणि अभ्यासपुरक वातावरण यामुळे मला यशस्वी होता आले. माझ्या या यशात स्वेरी परिवाराचा खूप मोठा वाटा आहे तसेच ‘पुढे जाऊन मी एमपीएससी आणि यूपीएससी साठीही प्रयत्न करणार आहे.’ संस्थेचे संस्थापक सचिव व अभियांत्रिकी महाविद्यालयाचे प्राचार्य डॉ.बी.पी. रोंगे, संस्थेचे अध्यक्ष नामदेव कागदे, उपाध्यक्ष अशोक भोसले तसेच संस्थेचे पदाधिकारी व विश्वस्त, स्वेरी अंतर्गत असलेल्या इतर महाविद्यालयांचे प्राचार्य, अधिष्ठाता, विभागप्रमुख, प्राध्यापक वर्ग, शिक्षकेतर कर्मचारी यांच्यासह पालकांनी विशाल भगरे यांचे अभिनंदन केले.
