चिमुकल्याचा चौथा वाढदिवस ठरला भयंकर, गाडीत फुग्यांचा स्फोट, बर्थडे बॉयसह तिघे भाजले

चिमुकल्याच्या चौथ्या वाढदिवसानिमित्त ‘सुपरमॅन थीम’वर आयोजित केलेली बर्थडे पार्टी कुटुंबाच्या आनंदावर विरजण टाकणारी ठरली. कारण हायड्रोजन गॅस भरलेल्या फुग्यांचा कारमध्येच स्फोट झाल्याने आग भडकून कारमधील तिघांना भाजले. यामध्ये चार वर्षांच्या बर्थडे बॉयचाही समावेश आहे.

फुग्यांमध्ये सुरक्षित मानल्या जाणाऱ्या हेलियम गॅसऐवजी अत्यंत ज्वलनशील असा हायड्रोजन वायू भरलेला होता. याबद्दल फुगे विक्रेत्याने कुटुंबाला कुठलीही चेतावनी दिली नसल्याचं कुटुंबीयांचं म्हणणं आहे. चिमुकल्याच्या आईने (ओळख न सांगण्याच्या अटीवर) सांगितले की वाढदिवसाच्या पार्टीहून घरी जात असताना कारमधील बूट स्पेसमध्ये उर्वरित फुगे ठेवले असताना कारमध्ये लहानसा स्फोट झाला.

इमारतीच्या प्रवेशद्वाराजवळ पोहोचले असताना कारमधील फुगे फुटू लागले. त्यामुळे अचानक ज्वाला आणि धुराचा लोट उठला. यामध्ये महिलेच्या परिचयातील दोघे जण आणि मागच्या सीटवर बसलेल्या तिच्या मुलाला त्रास झाला आणि ते भाजले. तर महिला कार चालवत होती.

“फुग्यांमुळे एवढ्या मोठ्या प्रमाणात आपत्ती ओढवू शकते याची कल्पनाही नव्हती” असा भीतीदायक अनुभव ३७ वर्षीय महिलेने सांगितला. हेलियमऐवजी हायड्रोजनच्या वापराबाबत माहिती द्यायला हवी होती असे म्हणत महिलेने फुगा विक्रेत्याला दोष दिला.

ही घटना 10 सप्टेंबर रोजी घडली असली तरी जखमी तिघांवर उपचार सुरुच होते. महिलेच्या मुलाचा चेहरा, कान आणि उजवा हात वरवर भाजले होते, तर तिच्या मित्र-मैत्रिणींना चेहऱ्यावर भाजल्याच्या जखमा होत्या. एकाला 12 दिवस हॉस्पिटलायझेशनची गरज पडली, तर दुसऱ्याला प्लास्टिक सर्जरी करावी लागली. माझा मुलगा या घटनेने इतका भेदरला आहे की थोडासा आवाज झाला तरी तो घाबरतो, असं महिलेने सांगितलं.