परीक्षेत कॉपी करत असल्याच्या संशयातून शिक्षकाने उतरवले कपडे, घरी जाताच विद्यार्थिनीने पेटवून घेतले

परीक्षेत कॉपी केल्याच्या संशयातून शिक्षकेने कपडे उतरवल्याने विद्यार्थिनीने स्वतःचे जीवन संपवण्याचा प्रयत्न केल्याची घटना झारखंडमधील जमशेदपूरमध्ये घडली आहे. या घटनेत विद्यार्थिनी गंभीर भाजली आहे. तिला उपचारासाठी एमजीएम रुग्णालयात दाखल करण्यात आले. मात्र तिची प्रकृती चिंताजनक असल्याने तिला टीएमएचमध्ये रेफर करण्यात आले आहे.

जमशेदपूरमधील छायानगरमध्ये राहणारी पीडित मुलगी साकची येथील शाळेत इयत्ता नववीत शिकत होती. सध्या शाळेत परीक्षा सुरु आहे. परिक्षेवेळी पीडित मुलगी कॉपी करत असल्याचा शिक्षिकेला संशय आला.

संशयातून शिक्षिकेने मुलीला वर्गात सर्वांसमोर कपडे उतरवायला सांगितले आणि मारहाण केली. यामुळे मानसिक तणावात आलेल्या मुलीने घरी जाऊन स्वतःला पेटवून घेतले, अशी माहिती मुलीने पोलीस जबाबात दिली आहे. आपण कोणतीही कॉपी केली नसल्याचे मुलीने सांगितले.

घटनेत मुलगी 80 टक्के भाजल्याने तिची प्रकृती चिंताजनक आहे. याप्रकरणी पीडित मुलीच्या नातेवाईकांनी रुग्णालयात गोंधळ घातला आहे. संबंधित शिक्षिकेवर कारवाईची मागणी नातेवाईकांनी केली आहे. घटनेचा तपास सितारामडेरा पोलीस करत आहेत.