जमिनीच्या वादातून विवाहितेसह दोन मुलींना जिवंत जाळण्याचा प्रयत्न

जमिनीच्या वादातून घराला आग लावत विवाहितेसह दोन मुलींना जिवंत जाळण्याचा प्रयत्न हल्ल्लेखोराच्या टोळीने केल्याची धक्कादायक घटना समोर आली आहे. ही घटना कल्याण तालुक्यातील वासुंद्री परिसरात घडली आहे. याप्रकरणी कल्याण तालुका पोलीस ठाण्यात गुन्हा दाखल करून पोलिसांनी आरोपींचा शोध सुरु केला आहे. लालचंद पाटील, बबलेश पाटील, नरेश पाटील, आशिष पाटील असे गुन्हा दाखल झालेल्या आरोपींची नावे आहेत.

पोलिसांनी दिलेल्या माहितीनुसार योगेश पाटील ( वय ३६) हे कल्याण तालुक्यातील टिटवाळा मार्गावरील वासुंद्री परिसरात पत्नी, व दोन मुलीसह राहतात. योगेश हे शहाड येथील सेंच्युरी रेयाॅन कंपनीत कामाला आहेत. योगेश आणि मांडा गावातील आरोपी लालचंद पाटीलसह बबलेश पाटील, नरेश पाटील, आशिष पाटील यांच्यात जमिनीवरुन वाद सुरू आहेत. आठ वर्षापूर्वी आरोपी पाटील बंधूंनी योगेशना बेदम मारहाण केली होती. तेव्हापासून त्यांच्यात धुसफूस सुरू आहे. त्यातच बुधवारी योगेश रात्रपाळी कामासाठी कंपनीत गेले.

त्यावेळी घरात त्यांची पत्नी व दोन लहान मुली होत्या. त्या दिवशी मध्यरात्री दीड वाजता घराच्या खिडकी जवळ बोलण्याचा आवाज आल्याने योगेशची पत्नी दीपाली हिने घरातील लाईट लावून पहिले असता, तिला खिडकीतून आरोपी लालचंद, बबलेश, नरेश, आशिष हे तेथून हातात ड्रम, बोळे घेऊन पळताना पाहिले. त्यांनीच घराची बाहेरून कडी लावत घरावर पेट्रोल ओतून त्यांना जिवंत जाळण्याचा प्रयत्न केला.

खळबळजनक बाब म्हणजे घराला आग लावण्यापूर्वी आजुबाजूला असलेल्या रहिवाशांच्या घरांना आरोपींनी कड्या लावल्याने शेजारचे रहिवासी घरात कोंडून राहिले होते. तर आग लागल्याचे पाहून पत्नी दीपाली यांनी घरातून ओरडा केल्यानंतर परिसरातील काही रहिवासी रात्री दीड वाजता जागे झाले. त्यांना योगेश पाटील यांच्या घराला आणि घरासमोरील रिक्षेला आग लागल्याचे लक्षात आल्याने शेजाऱ्यांनी घराच्या दरवाजाला बाहेरुन लावलेली कडी काढून तिला आणि तिच्या मुलींना सुखरुप बाहेर काढले.

पत्नी दीपाली व तिच्या आठ आणि दोन वर्षाच्या मुली धुराने कोंडून गुदमरल्या होत्या. जमिनीच्या वादातून आपल्या कुटुंबीयांना जिवंत जाळण्याचा प्रयत्न केल्याप्रकरणी योगेश यांनी कल्याण तालुका पोलीस ठाण्यात विविध कलमानुसार गुन्हा दाखल केला आहे. या गुन्ह्याचा अधिक तपास पोलीस निरीक्षक दिलीप देशमुख करीत आहेत.