विवाहितेच्या आत्महत्येनंतर माहेरच्यांचं धक्कादायक कृत्य, पतीच्या दारातच…

विवाहित महिलेच्या आत्महत्येनंतर माहेरच्या संतप्त नातेवाईकांनी थेट सासरच्या दारामध्ये चिता रचून अंत्यसंस्कार केल्याची धक्कादायक घटना घडली आहे. मिरज तालुक्यातल्या लक्ष्मीवाडी या ठिकाणी हा प्रकार घडला आहे. या प्रकरणी मिरज ग्रामीण पोलीस ठाण्यामध्ये सासरच्या मंडळींवर गुन्हा दाखल झाला आहे.

सांगलीच्या मिरज तालुक्यातल्या आरग नजीकच्या लक्ष्मीवाडी या ठिकाणी असणाऱ्या एका विवाहित महिलेने विहिरीमध्ये उडी घेऊन आत्महत्या केल्याचा प्रकार घडला आहे. आरती अभिनंदन तळदंगे, वय २६, असे या विवाहित महिलेचे नाव आहे. शुक्रवारी हा सगळा प्रकार समोर आला. त्यानंतर आरती यांच्या कर्नाटक येथील माहेरच्या मंडळींनी लक्ष्मीवाडी या ठिकाणी धाव घेतली. हुंड्यासाठी सासरच्या मंडळींकडून छळ करून खून केल्याचा आरोप माहेरच्या मंडळीने केला. इतकंच नाहीतर संतप्त नातेवाईकांनी पती अभिनंदन तळंदगे याच्या दारामध्ये चिता रचून आरतीवर अंत्यसंस्कार केले आहेत. या घटनेमुळे लक्ष्मीवाडी गावात तणावाचं वातावरण निर्माण झालं होतं.

या घटनेनंतर मिरज ग्रामीण पोलीस स्थानकात पती अभिनंदन तळदंगे याच्यासह चौघांच्यावर गुन्हा दाखल करण्यात आला आहे तर पतीसह दोघांना अटक करण्यात आली आहे. माहेरहून पैसे आणण्यासाठी पती, सासू-सासरे आणि नणंदकडून वारंवार छळ करण्यात येत होता. आरतीला मानसिक आणि शारीरिक त्रास देण्यात येत होता. त्यामुळे ही हत्या करण्यात आल्याचा आरोप मृत आरतीच्या माहेरच्या नातेवाईकांनी केली आहे.