18 वर्षांच्या मुलांना मिळणार 22 वर्षांसाठी ड्रायव्हिंग लायसन्स

टू व्हीलर किंवा कार ड्रायव्हिंग लायसन्ससाठी अर्ज करणाऱ्या 18 वर्षांच्या कॉलेज तरुणांसाठी चांगली बातमी आहे. मोटार वाहन दुरुस्ती कायद्यानुसार आता परवाना 22 वर्षांच्या कालावधीसाठी वैध असेल, असे ताडदेव RTO ने मंगळवारी जारी केलेल्या प्रसिद्धी पत्रकात नमूद केले आहे:

ताडदेव आरटीओचे प्रादेशिक परिवहन अधिकारी भरत काळसकर याविषयी म्हणाले कि ‘अनेक नागरिकांना वयोगटानुसार परवान्यांच्या वैधतेबद्दल माहिती नसते.

प्रसिद्धी पत्रकात स्पष्ट सांगण्यात आले आहे की 30 वर्षांपर्यंतच्या लोकांसाठी, ड्रायव्हिंग लायसन्स 40 वर्षांपर्यंत वैध असेल. 31 ते 50 वयोगटातील, नवीन परवाना नूतनीकरणाची वैधता दहा वर्षांसाठी असेल तर 51-55 वयोगटासाठी, नवीन परवाना 60 वर्षांपर्यंत वैध असेल. ५५ वर्षांच्या वरील परवाना नूतनीकरणासाठी अर्ज करणाऱ्यांसाठी, वैधता पाच वर्षांच्या कालावधीसाठी असेल, असेही त्यांनी सांगितले.

आरटीओच्या आणखी एका वरिष्ठ अधिकाऱ्याने सांगितले की, ज्यांच्या परवान्यांची मुदत संपली आहे त्यांनी एक वर्षाच्या आत आपल्या परवान्यांचे नूतनीकरण करणे गरजेचे आहे. अन्यथा, संबंधित व्यक्तीला परवाना मिळण्यासाठी पुन्हा एकदा ऑनलाइन चाचणीने सुरुवात करावी लागेल. मागील एक वर्षात काही जणांना हि चाचणी पुन्हा द्यावी लागल्याचे त्यांनी सांगितले.

शिकाऊ परवाना घरबसल्या मिळणार

शिकाऊ परवाना आता घरबसल्याच ऑनलाइन मिळवता येणार आहे. अधिकाऱ्यांच्या म्हणण्याप्रमाणे आरटीओ कार्यालयांमध्ये नेहमीच ड्रायव्हिंग चाचण्यांसाठी अर्जदारांची मोठी गर्दी असते, म्हणूनच आम्ही ताडदेव, अंधेरी, वडाळा आणि बोरिवली येथे या चारही ठिकाणी स्लॉट वाढवले ​​आहेत. ताडदेव आरटीओमधील स्लॉट अलीकडेच एका दिवसात सुमारे 600 वरून 900 उमेदवारांपर्यंत वाढवण्यात आले असल्याचे काळसकर यांनी सांगितले.