युग संपले, भारतरत्न गानसम्राज्ञी लता मंगेशकर यांचं निधन

हिंदुस्थानी संगीत विश्वातला एक अढळ ध्रुवतारा, हिंदुस्थानच्या स्वरसम्राज्ञी, गानकोकिळा, भारतरत्न लता मंगेशकर यांचे निधन झाले आहे.

त्या 92 वर्षांच्या होत्या. सकाळी 8.12 मिनिटांनी त्यांनी अखेरचा श्वास घेतला. लतादीदींची प्रकृती खालावल्याने त्यांना व्हेंटीलेटरवर ठेवण्यात आले होते.

गानसम्राज्ञी लता मंगेशकर नुकत्याच कोरोनातून बऱ्या झाल्या होत्या. लतादीदींना गेल्या महिन्यात कोरोनाची लागण झाल्याने त्यांच्यावर ब्रीच कॅण्डी रुग्णालयात आयसीयूमध्ये उपचार सुरू होते.

त्यांना कोरोनासोबतच न्युमोनियाचीही लागण झाली होती. या दोन्हीवर त्यांनी मात केली होती. कोरोनातून बरे झाल्यानंतर लतादीदींना अशक्तपणा जाणवत असल्यामुळे त्यांना काही दिवस आयसीयूमध्ये ठेवण्यात आले होते.