निवृत्त पोलिसाला विष पाजून मारण्याचा प्रयत्न, सुनेसह तिघांवर गुन्हा दाखल

सेवानिवृत्त पोलीस कर्मचाऱ्याला विष पाजून त्यांचा खून करण्याचा प्रयत्न केल्याप्रकरणी सुनेसह तिघांवर एमआयडीसी पोलीस ठाण्यात गुन्हा दाखल करण्यात आला आहे.

सून सोनाली संतोष जाधव, वैभव ऊर्फ महेश बाळासाहेब सातपुते, बाळासाहेब सातपुते (सर्व रा.शेंडी बायपास, वडगाव गुप्ता) अशी आरोपींची नावे आहेत. याप्रकरणी गिन्यादेव नामदेव जाधव (वय 60, मुळ रा. बोल्हेगाव, ता. नगर, सध्या रा. पाथर्डी) यांनी फिर्याद दिली आहे.

जाधव हे दुचाकीवरून मोहज येथून त्यांच्या मुलाकडे जाण्यासाठी जात असताना त्यांची सून सोनाली हिने हात दाखवून गाडी थांबविण्यास सांगितले. जाधव हे गाडी थांबवून स्टॅण्डवर लावत असताना सोनालीने त्यांना खाली पाडले. तसेच बाळासाहेब सातपुते याने हात धरले व वैभव सातपुते याने नाक दाबून तोंडात विषारी बाटलीतील औषध ओतले.

‘तू पेन्शनर पोलीस असल्याने मी तुझ्यावर दाखल केलेल्या गुन्ह्यात तुला पोलिसांनी अटक केली नाही. आता तुला कोण वाचवायाला येतो? तुला वाचविणारे कोणी नाही,’ असे म्हणत शिवीगाळ करून त्यांच्या तोंडात विष ओतून ठार मारण्याचा प्रयत्न केल्याचे फिर्यादीत म्हटले आहे.

याप्रकरणी एमआयडीसी पोलीस ठाण्यात सुनेसह तिघांवर गुन्हा दाखल करण्यात आला असून, पोलीस उपनिरीक्षक पाठक तपास करीत आहेत.