एकाच घरामध्ये पुरुषासह महिलेचा मृतदेह आढळून आल्यानं खळबळ

पुण्यातील मुंढवा परिसरातील केशवनगर  येथील कुंभारवाडा  येथे एका घरामध्ये एका पुरूषासह महिलेचा मृतदेह आढळून आल्यानं खळबळ उडाली आहे. हा धक्कादायक प्रकार दुपारी 1 वाजण्याच्या सुमारास उघडकीस आला असून मुंढवा पोलिस ठाण्यातील पोलिस अधिकाऱ्यांनी घटनास्थळी धाव घेतली आहे.

शरद भुजबळ (47) आणि हेमा (43 – ही नेपाळी महिला आहे) यांचे मृतदेह आढळून आले आहेत. शरद भुजबळ हा एनआयबीएम रोडवरील एका ट्रव्हल्समध्ये ड्रायव्हर म्हणून काम करत होता.

शरद याच्याशी संपर्क होत नसल्याने त्याच्या मित्राने त्याचे घर गाठले. मित्र जेव्हा घरी आला तेव्हा हा प्रकार उघडकीस आला आहे. दरम्यान, घरातील गॅस चालू होता पण सिलेंडर संपलेले होते. घराच्या शेजारी केमिकलचे कॅन आढळून आले आहेत.

शरद आणि हेमा यांच्या नाकातून रक्त येत असल्याचं देखील पोलिसांना दिसलं आहे. दोघांचेही मृतदेह शवविच्छेदनासाठी ससून रूग्णालयात पाठविण्यात आले आहे. मुंडवा पोलिस या घटनेचा संपूर्ण तपास करत आहे. या दोघांनी आत्महत्या केली की कुठला घातपात आहे याचा शोध पोलिस घेत आहेत.