उदयनराजे भोसले यांची संतप्त फेसबुक पोस्ट

भाजपचे राज्यसभा खासदार उदयनराजे भोसले यांनी एक संतप्त फेबसुक पोस्ट लिहिली आहे. तसेच या फेबसुक पोस्टमध्ये त्यांनी कोणत्याही नेत्याचे नाव न घेता, त्यांच्यावर निशाणा साधला आहे. सातारा जिल्हा मध्यवर्ती बॅंकेच्या निवडणुकीच्या पार्श्वभूमीवर सातारा जिल्ह्यातील नेत्यांची पुण्यात बैठक झाली. यावर उदयनराजे भोसले यांनी आपल्या फेसबुकवर संतप्त पोस्ट लिहिली आहे.

सातारा जिल्हा मध्यवर्ती सहकारी बँकेच्या निवडणुकीच्या अनुषंगाने गुरुवारी पुण्यात जिल्ह्यातील नेत्यांची बैठक झाली. ही बैठक अजित पवार यांच्या अध्यक्षतेखाली होणार होती. परंतु काही कारणास्तव अजित पवार या बैठकीला उपस्थित राहू शकले नाहीत. त्यामुळे बैठकीला विधान परिषदेचे सभापती रामराजे नाईक निंबाळकर, सहकार मंत्री बाळासाहेब पाटील, आमदार शशिकांत शिंदे, आमदार मकरंद पाटील, आमदार शिवेंद्रसिंहराजे भोसले, माजी मंत्री विक्रमसिंह पाटणकर, प्रभाकर देशमुख आदी उपस्थित होते.

उदयनराजे म्हणाले की, सातारा जिल्ह्यातील निर्णय जिल्ह्यातच झाले पाहीजेत बैठक कुठंतरी बोलावली आहे. वास्तविक जे मतदार तुम्हाला मत देणार आहेत, आजपर्यंत मत देत आले आहेत, त्यांची मतेमतांतरे अजमावण्यासाठी वार्षिक सर्वसाधारण सभेसारखी बैठक बोलवली असती तर ते संयुक्तिक ठरले असते, असे म्हटलं आहे.

मत कोणाला द्यायचे हा मतदारांचा सार्वभौम अधिकार आहे. मतदान यालाच करा, त्यालाच करा असं बंधन आवश्यक नाही ज्यावेळी नको ती लोकं निवडुन बँकेत जातात, त्यावेळेस सहकारी संस्था मोडकळीस आल्या, काही संस्था लिक्वीडेशनमध्ये गेल्या, खाजगीकरण झाले, काही जिल्ह्यातील जिल्हा मध्यवर्ती बँका सुध्दा दिवाळखोरीत गेल्याची उदाहरणे आहेत, ज्यांनी सहकारी संस्था स्थापन केल्या, ज्यांनी त्या संस्था मोडकळीस आणल्या, खाजगीकरण केले, त्या लोकांना बँकेच्या व शेतकरी सभासदांच्या लोकहितासाठी बँकेपासून दूर ठेवणे आणि जिल्ह्याचे निर्णय जिल्ह्यातील व्यक्तींनी सार्वमत अजमावून घेणे आजच्या घडीला गरजेचे आहे असे शेतकरी सभासदांच्या वतीने आम्हाला वाटते, परंतु आमचे म्हणणे पचवता येणारे नसल्याने, पटणार नाही.