रिक्षाचालक तरुणाचा झोपेतच गळा चिरून खून; बाजूला झोपलेल्या भावाला पत्ताच नाही!

हडपसर हद्दीत पंधरा नंबर चौक येथील राहत्या घरात सख्ख्या भावाचा झोपेत असताना चाकूने गळा चिरून खून केल्याची संशय पोलिसांनी व्यक्त केला आहे, ही धक्कादायक घटना पहाटे उघडकीस आली आहे.

प्रदीप शिवाजी गवळी ( वय २३ रा.पंधरा नंबर,हडपसर मूळ रा.तुळजापूर ) असे खून झालेल्या व्यक्तीचे नाव आहे. या प्रकरणी घटनास्थळी पोलिसांनी धाव घेतली असून घरामध्ये रक्ताच्या थारोळ्यात पडलेल्या प्रदीपला पंचनामा करून ससून रुग्णालयात शवविच्छेदनासाठी पाठवण्यात आले आहे.

हडपसर विभागाचे सहाय्यक पोलीस आयुक्त कल्याणराव विधाते यांनी दिलेल्या माहितीनुसार, मृत प्रदीप व त्याचा २९ वर्षाचा भाऊ हे दोघेच भाड्याने घेतलेल्या घरामध्ये राहत. प्रदीप रिक्षा चालवत होता तर त्याचा भाऊ हा ट्रॅव्हल्सच्या गाड्या सोडण्याचे काम करत होता. सोमवारी रात्री दोघे जेवण करून झोपी गेले होते. मात्र पहाटे प्रदीप रक्ताच्या थारोळ्यात पडला असल्याचे भावाने सांगितले आहे. घटनास्थळी चाकू पोलिसांना मिळून आला आहे. मृतदेह घरातच मिळून आल्याने पोलिसांचा भावावरच संशय येत असून त्याला चौकशीसाठी ताब्यात घेतले आहे.

ठाण्याला राहत असणाऱ्या वडिलांना पोलिसांनी बोलावून घेतले आहे. याबाबत पुढील तपास करण्यात येत असून लवकरच खुनाची उकल होईल, असा विश्वास सहायक आयुक्त विधाते यांनी व्यक्त केला आहे.