आमदार प्रशांत परिचारक पुन्हा आमदार होणार ?

नगर पालिका निवडणुकीपूर्वीच विधान परिषद निवडणुकीचा बिगुल वाजणार ?

सोलापूर जिल्ह्यात पुन्हा राजकारण तापणार असून विधान परिषदेचे स्थानिक स्वराज्य संस्था मतदार संघाचे आमदार प्रशांत परिचारक यांचा कार्यकाळ १५ डिसेंबर रोजी संपत असल्याने या महिना अखेरीस निवडणूक कार्यक्रम जाहीर करून ऑक्टोबरच्या मध्यात हि निवडणूक प्रक्रिया पार पाडली जाणार असल्याची शक्यता वर्तविली जात आहे.डिसेंबर २०१५ मध्ये झालेल्या विधान परिषदेच्या निवडणुकीत आमदार प्रशांत परिचारक यांनी राष्ट्रवादीचे उमेदवार दीपक साळूंखे यांचा १४१ मतांनी पराभव करत दणदणीत विजय संपादन केला होता.त्यांचा ६ वर्षाचा कार्यकाळ डिसेंबर मध्ये पूर्ण होत असल्याने या निवडणूक प्रक्रियेचे सूत्रे हालू लागले आहेत.राज्यात महाविकास आघाडी सत्तेत आल्यानंतर राजकीय समीकरणे बदलली आहेत. गत निवडणुकीत राष्ट्रवादीचे दीपक साळूंखे यांच्यासाठी प्रयत्नांची पराकाष्टा केलेले रणजितसिह मोहिते पाटील  हे आता भाजपात आहेत. तर सोलापूर जिल्ह्यात ८ आमदार आणि २ खासदार भाजपचे असून तेही या निवडणुकीत महत्वपूर्ण भूमिका बजावणार आहेत.             

आगामी स्थानिक स्वराज्य संस्था विधान परिषद निवडणुकीत भाजपकडून विद्यमान आमदार प्रशांत परिचारक यांची उमेदवारीचा निश्चित मानली जात असून गत विधान परिषद निवडणुकीत एकूण ३९८ पैकी ३९६ मतदारांनी आपला मतदानाचा हक्क बजावला होता यात महायुतीचे उमेदवार परिचारक यांना २६१ तर दीपक साळूंखे यांना केवळ १२० मते मिळाली होती.या निवडणुकीत जिल्ह्यातील सोलापूर महापालिकेसह विवीध नगर पालिकेचे नगरसेवक,जिल्हा परिषद सदस्य आणि पंचायत समिती सभापती यांना मतदान करता येते.यंदाच्या निवडणुकीत नगरसेवक मतदार संख्या वाढणार असल्याचे मानले जात असून अकलूज,मोहोळ नगर पालिका झाल्याने येथील नगरसेवकांनाही मतदानाचा हक्क मिळणे अपेक्षित आहे.       

 राज्यात महाविकास आघाडीची सत्ता असली तरी सोलापूर जिल्हयाच्या राजकारणावर भाजपाची पकड मोठी असून ८ आमदार आणि २ खासदार भाजपचे आहेत तर जिल्हा परिषदेवर तूर्तास तरी भाजप समर्थकांचेच वर्चस्व आहे.डिसेंबर २०२० मध्ये विधान परिषदेच्या पुणे विभाग शिक्षक व पदवीधर मतदार संघासाठी झालेल्या निवडणुकीत भाजपचा धक्कादायक पराभव करत महाविकास आघाडीचे उमेदवार दोन्ही मतदार संघातून विजयी झाले होते.त्यामुळे भाजपच्या गोटात काहीसे नैराश्य आले होते.मात्र एप्रिल २०२१ मध्ये झालेल्या पंढरपूर विधान सभा मतदार संघाच्या पोटनिवडणुकीत भाजपचे उमेदवार समाधान आवताडे यांच्या विजयाने जनतेत महाविकास आघाडीच्या कारभाराबाबत नाराजी आहे हा संदेश राज्यभर पोहोचविण्यासाठी भाजपला बळ मिळाले होते.     

 सोलापूर जिल्हा स्थानिक स्वराज्य संस्था विधान परिषद मतदार संघाची निवडणूक प्रक्रिया नोव्हेंबर अखेर पूर्ण केली जाणार असल्याची चर्चा असतानाच या निवडणुकीत पुन्हा भाजपचे व मित्रपक्षाचे उमेदवार म्हणून विद्यमान आमदार प्रशांत परिचारक यांच्या उमेदवारी बाबत पक्षाचे वरिष्ठ नेते अनुकूल असून आमदार रणजितसिह मोहिते पाटील यांना गतवर्षी विधान परिषदेवर संधी मिळाली असल्याने आमदार परिचारक यांच्या उमेदवारीचा मार्ग आणखी सुकर झाला आहे.अशातच परिचारकांच्या उमेदवारीसाठी राज्याचे विरोधी पक्ष नेते देवेंद्र फडणवीस यांच्यासह सोलापूर  जिल्ह्यातील भाजपचे बहुतांश आमदार आणि दोन्ही खासदार हे अनुकूल असल्याचे समजते तर आमदार सुभाष देशमुख हेही विधान परिषद निवडणुकीत विजयासाठी कराव्या लागणाऱ्या अर्थपूर्ण उपाय योजना लक्षात घेत विद्यमान आमदार प्रशांत परिचारक यांच्या उमेदवारीस संमती दर्शवतील अशी शक्यता वर्तविली जात आहे.        

पंढरपूरसह सोलापूर जिल्ह्यातील बहुतांश नगर पालिकेच्या निवडणुका डिसेंबर २०२१ पूर्वी होणे अपेक्षित आहे.मात्र नगर पालिकांच्या निवडणुकीपूर्वीच विधान परिषदेच्या निवडणूक प्रक्रिया पार पाडली जाण्याची शक्यता असल्याने नगरसेवकांमध्ये मात्र आनंदाचे वातावरण असून विधान परिषदेच्या निवडणुकीत मतदान केल्यानंतर नगर पालिकेच्या पुढील निवडणुकीत आणखी ”जोमाने” तयारीनिशी मैदानात उतरता येणार असल्याची खुमासदार चर्चाही सुरु झाली आहे.