मालिकेतून गौतम बुद्धांचा अवमान, निर्माते महेश कोठारे यांची जाहीर माफी

छोट्या पडद्यावरील एका मालिकेतून भगवान गौतम बुद्ध यांचा अवमान झाल्याने वाद निर्माण झाला होता. पण, त्यावर मालिकेचे निर्माते महेश कोठारे यांनी माफी मागितली आहे.स्टार प्रवाह या वाहिनीवरील सुख म्हणजे नक्की काय असतं या मालिकेशी निगडीत हे प्रकरण आहे.

या मालिकेतील एका व्यक्तिरेखेने भगवान गौतम बुद्धांचा चेहरा असलेली वेशभूषा केली होती. त्यावरून वाद निर्माण झाला होता.त्या वादावर मालिकेचे निर्माते, ज्येष्ठ अभिनेता आणि दिग्दर्शक महेश कोठारे यांनी फेसबुक व्हिडीओच्या माध्यमातून जाहीर माफी मागितली आहे.

ते म्हणाले की, भगवान गौतम बुद्धांचा आपण आदर करतो. ही चूक अनावधानाने घडली आहे. तरीही कुणाच्याही भावनांना ठेच पोहोचली असल्यास मी जाहीर माफी मागतो आणि यापुढे असं होणार नाही, याची ग्वाही देतो, असं कोठारे यांनी आपल्या व्हिडीओत म्हटलं आहे. त्यावर नेटकऱ्यांनीही त्यांना प्रतिसाद दिला असून त्यांची माफी स्वीकारल्याचं म्हटलं आहे.