पोलीस भरती प्रक्रियेतील ‘मुन्नाभाई’ पकडला

पोलीस भरती परीक्षेत ब्ल्यूटूथ मायक्रो एयरफोनचा वापर करून बाहेरून उत्तरे मागवणाऱ्या परीक्षार्थींला एमआयडीसी सिडको पोलिसांच्या पथकाने रंगेहात पकडले.

ही कारवाई चिकलठाणा परिसरातील न्यू हायस्कुल माध्यमिक व उच्च माध्यमिक विद्यालयात बुधवारी सकाळी अकराच्या सुमारास करण्यात आली. राहुल मदन राठोड (२३, रा. पारुंडी तांडा, ता. पैठण) असे अटकेतील कॉपी बहाद्दराचे नाव असून मोबाईलला ब्ल्यूटूथच्या साह्याने जोडलेल्या मख्खी एअर फोनद्वारे प्रश्न बाहेर बसलेल्या सतिष राठोडला सांगून त्याच्याकडून उत्तरे मागवत होता. तर सातारा परिसरातील एका केंद्रावर एक अल्पवयीन बोगस परीक्षार्थी देखील पकडला आहे.

पोलीस दलात चालक शिपाई पदासाठी भरती प्रक्रिया सुरू आहे. त्यासाठी बुधवारी पात्र विद्यार्थ्यांची लेखी परीक्षा सकाळी दहा ते साडे अकरा या वेळेत शहरातील दहा केंद्रांवर घेण्यात आली. परिक्षेसाठी ३३६० पैकी १४९१ उमेदवारांनी परिक्षा दिली.

मात्र, चिकलठाणा परिसरातील न्यू हायस्कुल माध्यमीक व उच्च माध्यमीक विद्यालयातील केंद्रावर एमआयडीसी सिडको ठाण्याचे निरीक्षक विठ्ठल पोटे, उपनिरीक्षक अमरनाथ नागरे, एस. बी. मांटे, दिनकर सोनगिरे, शिपाई पुरी, बनसोडे आणि सुवर्णा ढाकणे पाहणी करण्यासाठी गेले होते. यावेळी परीक्षार्थी राहुल राठोड हा मोबाईल, मास्टरकार्ड ब्लूटूथ कनेक्टर डिव्हाईस आणि ब्लूटुथ मख्खी एअरफोन बाळगताना आढळून आला.

विशेष म्हणजे त्याच्या सहाय्याने प्रश्न बाहेर पाठवून साथिदार सतिष राठोड याच्याकडून उत्तरे मिळवत असल्याचे उघडकीस आले. त्याला पोलिसांनी अटक केली असून याप्रकरणी एमआयडीसी सिडको पोलीस ठाण्यात गुन्हा दाखल करण्यात आला आहे. प्रकरणाचा पुढील तपास उपनिरीक्षक अमरनाथ नागरे करत आहेत. तर सातारा परिसरातील केंद्रावर पकडलेल्या बोगस परीक्षार्थीविरुद्ध गुन्हा दाखल करण्यात आला आहे.