भाजपच्या माजी नगरसेवकाने दिली खुनाची सुपारी,घटनेपूर्वीच सुपारी किलर पोलिसांच्या ताब्यात

पुणे कॅन्टोन्मेंटचे माजी उपाध्यक्ष व भाजपचे माजी नगरसेवक विवेक महादेव यादव यांनी त्यांचा विरोधक असलेल्या बबलू गवळी याच्या खूनाची सुपारी कारागृहातून सुटलेल्या सराईत गुन्हेगार व त्याच्या साथीदाराला दिली असल्याची व हे दोन्ही सराईत सुपारी किलर खुनाच्या हेतूने वावरत असल्याची माहिती खबऱ्याद्वारे मिळताच पोलीस उपनिरीक्षक प्रभाकर कापुरे गस्तीवर असताना पोलीस कर्मचारी सुशील धिवार व त्यांच्या सहकाऱ्यांनी तातडीने कारवाई करत राजन जॉन राजमनी (वय 38, रा.भाग्योदय नगर, कोंढवा), इब्राहिम उर्फ हुसेन याकुब शेख (वय 27, रा काळा खडक वाकड,पिंपरी-चिंचवड) या दोघा सुपारी किलरना पोलिसांनी सापळा रचून अटक केली आहे.

खुनाची सुपारी घातलेले दोघे आरोपी कोंढवा परिसरात येणार असल्याची खबर मिळताच सापळा रचून दोघांना अटक करण्यात आली असता त्यांच्या  अंगझडतीत तीन पिस्तूले, तीन काडतूसे व रोख 1 लाख 20 हजार रुपये मिळाले.आरोपीना पोलिसी खाक्‍या दाखवताच त्यांनी विवेक यादव यांनी सुपारी दिल्याची कबुली दिली.आरोपीकडून हस्तगत करण्यात आलेल्या  मोबाईलचे कॉल डिटेल्स तपासले असता त्यामध्ये राजन याने व्हिके व व्हिके न्यू या नावाने सेव्ह असलेल्या दोन मोबाईल क्रमांकावर संशयास्पद संभाषण झाले असल्याचे दिसून आले आहे.