धक्कादायक! पुराच्या पाण्यातून नेली एसटी

महाड: नदीवरील पुलावरून पुराचे पाणी वाहत असताना देखील पुलावरून एसटी बस नेत प्रवाशांचा जीव धोक्यात घालणाऱ्या एसटी चालकाला आणि वाहकाला निलंबित करण्यात आले आहे. रायगड जिल्हा परिवहन मंडळाने ही कारवाई केली आहे. रायगड जिल्ह्यातील महाड तालुक्यातील रेवतळे फाट्याजवळ सोमवारी ही घटना घडली.विजयकुमाक रामचंद्र जाधव असे प्रवाशांचा जीव धोक्यात घालणाऱ्या एसटी वाहकाचे नाव आहे. तर, अशोक लक्ष्मण दराडे असे वाहकाचे नाव आहे.

सोमवारी, 12 जुलै रोजी पिंपरी-चिंचवड डेपोची MH-14 BT-4578 या क्रमांकाच्या एसटी बस घेऊन हे दोघे रेवतळे फाट्याहून वेळासकडे जात होते. या एसटीमध्ये एकूण ५२ प्रवासी होते.वेळासकडे जाताना (रत्नागिरी) ही एसटी महाड तालुक्यातील रेवतळे फाटा येथे आली असता नागेश्वरी बंधारा आणि खाडीपट्ट्याकडे जाणारा रस्ता ओव्हरफ्लो झाला होता. संपूर्ण रस्ता पाण्याखाली गेला होता.

अशी स्थिती असतानाही एसटी चालकाने धोका पत्करून गाडी पुढे रेटली आणि वाहणाऱ्या पाण्यातून मार्ग काढला.प्रवाशांचा जीव धोक्यात घालणाऱ्या या घटनेची माहिती मिळताच या एसटीचे चालक आणि वाहक अशा दोघांना निलंबित करण्यात आले.ही माहिती रायगड जिल्हा परिवहन मंडळाच्या विभाग नियंत्रक अनघा बारटक्के यांनी दिली.