मतदारयादीत रंगीत छायाचित्र नसल्यास नावे वगळणार

ज्या मतदारांची रंगीत छायाचित्रे मतदारयादीत नाहीत, अशा मतदारांची नावे मतदारयादीतून वगळण्यात येणार आहेत. निवडणूक आयोगाच्या या निर्णयामुळे आता मतदारांना मतदारयादीत आपले छायाचित्र रंगीत आहे किंवा कसे, याची पडताळणी करावी लागणार आहे.

निवडणूक आयोगाच्या आदेशानुसार सध्या मतदारयादीमधील छायाचित्रांची पडताळणी सुरू आहे. यामध्ये ज्या मतदारांचे छायाचित्रे मतदारयादीत नाहीत, त्यांची छायाचित्रे जमा केली जात आहेत. त्याचबरोबर रंगीत छायाचित्र नसेल, तर संबंधित मतदाराचे नाव मतदारयादीतून वगळले जाणार आहे.

पुणे जिल्ह्यातील 21 विधानसभा मतदारसंघांमध्ये सध्या मतदारयादीतील छायाचित्र पडताळणी आणि नव्याने छायाचित्र जमा करण्याची मोहीम सध्या सुरू झाली आहे.

आजपासून आठ दिवसांच्या आत ज्या मतदारांच्या मतदारयादीमध्ये छायाचित्र नसेल, अशा मतदारांनी आपल्या दोन पासपोर्ट रंगीत छायाचित्रांसह आधार कार्डची छायांकित प्रत, वीज देयकाची छायांकित प्रत तहसील कार्यालय किंवा संबंधित विधानसभा मतदारसंघाच्या मतदार नोंदणी अधिकारी कार्यालयामध्ये जमा करण्यास सांगितले आहे.

यादीत नाव असूनही छायाचित्र नसणे, पूर्ण माहिती नसणे, तसेच पत्ता अद्ययावत करणे आदींबाबत कागदपत्रे कार्यालयात जमा करावीत किंवा निवडणूक आयोगाच्या वेबसाइटवर ऑनलाइन अर्ज नमुना क्र. 8 भरावेत. ज्या मतदारांची छायाचित्रे आठ दिवसांत जमा होणार नाहीत, ऑनलाइन अर्ज नमुना क्र.8 मध्ये प्राप्त होणार नाहीत, अशा मतदारांची नावे मतदारयादीतून वगळण्याबाबत पुढील योग्य ती कार्यवाही केली जाणार असल्याचे प्रशासनाने स्पष्ट केले आहे.