लसीकरणातील अंतर वाढवणे धोकादायक, अँथनी फाउची यांचा इशारा

लशीच्या दोन डोसमधील अंतर वाढविल्याने कोव्हिडच्या विषाणूंची बाधा होण्याची शक्यता वाढत असल्याचा इशारा अमेरिकेच्या अध्यक्षांचे वैद्यकीय सल्लागार डॉ. अँथनी फाउची यांनी दिला आहे. एनडीटीव्ही या वाहिनीशी बोलताना त्यांनी हा इशारा दिला.

केंद्र सरकारने गेल्या महिन्यांत दोन डोसमधील अंतर ८४ दिवसांपर्यंत वाढविले आहे. त्यावर फाउची बोलत होते. ते म्हणाले, ‘मॉडर्नाच्या दोन डोसमधील अंतर चार आठवडे आणि फायझरच्या दोन डोसमधील अंतर तीन आठवडे आहे. दोन डोसमधील अंतर वाढविले तर तुम्ही करोनाच्या विषाणूला बळी पडण्याची शक्यता वाढते. ब्रिटनमध्ये हेच घडले. त्यांनी दोन डोसमधील अंतर वाढविले आणि तेथे त्या काळात करोनाच्या व्हेरियंटचा प्रादुर्भाव झाला. त्यामुळे आम्ही दोन डोसमधील अंतर निश्चित असण्याची शिफारस करतो.’ लशीचा पुरवठा अल्प असल्याने दोन डोसमधील अंतर वाढविले असावे, अशी टिप्पणीही त्यांनी केली.

केंद्र सरकारने गेल्या महिन्यांत कोव्हिशील्ड लशीच्या दोन डोसमधील अंतर सहा ते आठ आठवड्यावरून १२ ते १६ आठवडे केले होते. कोव्हिशील्डच्या लशींमधील हे अंतर तीन महिन्यांत दुसऱ्यांदा वाढविण्यात आले होते. मार्च महिन्यांत राज्यांना लशीच्या दोन डोसमधील अंतर २८ दिवसांवरून सहा ते आठ आठवडे करण्याचे आदेश देण्यात आले होते. यामुळे लशीची परिणामकारकता वाढत असल्याचे सांगण्यात आले. सरकार जास्तीत जास्त लोकांना लशीचा पहिला डोस देण्यासाठी आणि लशीचा तुटवडा असल्याने हे बदल करीत असल्याचे दिसून येत होते. हा माफक दृष्टिकोन असल्याचे फाउची म्हणाले. करोना विषाणूच्या पुढे राहण्यासाठी जास्तीत जास्त लोकांचे लसीकरण करणे महत्त्वाचे आहे. विशेषत: डेल्टा व्हेरियंटसाठी ते आवश्यक आहे, असेही त्यांनी सांगितले.

डेल्टा विषाणू अधिक जोरकसपणे पसरतो आणि त्यामुळे हा विषाणू असलेल्या कोणत्याही देशाने चिंता करावी. त्याचा मुकाबला करण्यासाठी मोठी तयारी आणि लसीकरण करावे, असेही फाउची म्हणाले.

दरम्यान,काल वैद्यकीय तज्ज्ञांच्या समितीने लस घेतलेल्या लोकांनाही पुन्हा करोनाची लागण होऊ शकते, असे म्हटले आहे. त्यावरही फाउची यांनी मत व्यक्त केले असून, ते म्हणाले, की जरी करोनाची लागण होऊन गेली असली तरी लस घेणे आवश्यक आहे.