13 वर्षाच्या मुलाकडून 25 वर्षीय मोठ्या भावाची हत्या; धक्कादायक कारण आलं समोर

ठाणे | ठाणे येथे एक धक्कादायक घटना घडली आहे. एका अल्पवयीन मुलाने आपल्याच मोठ्या भावाचा खून केल्याची घटना उघडकीस आली आहे. या घटनेनंतर संपूर्ण परिसरात एकच खळबळ उडाली आहे. लहान मुलाने असं कृत्य केल्यामुळे अनेक प्रश्न उपस्थित झाले होते. मात्र तपास केल्यानंतर धक्कादायक कारण समोर आलं आहे.

संबंधित मृत मोठ्या भावाचं नाव हफिजुल्लाह अन्सारी असं आहे. हफिजुल्लाह भिवंडीतील ओवळी येथील एका कंपनीमध्ये हमालीचं काम करत होता. एक महिन्यापुर्वी आपल्या 13 वर्षांच्या लहान भावाला उत्तर प्रदेश वरुन बोलावून हफिजुल्लाहने त्याला देखील त्या कंपनीमध्ये कामाला लावलं. दोघे भाऊ भिवंडीतील एका खोलीत राहत होते.

1 मे रोजी दोघा भावांचा पगार झाला. यामध्ये छोट्या भावाला देखील 7 हजार रुपये मिळावे. मात्र आपला भाऊ छोटा असल्यामुळे हफिजुल्लाहने त्याच्या कडून पैसे काढून घेतले. याच रागात हफिजुल्लाहच्या लहान भावाने हफिजुल्लाहच्या डोक्यात लाकडी पळिनं वार केला. यादरम्यान हफिजुल्लाह बेशुद्ध झाला. त्यानंतर आपल्या भावाच्या तोंडात बोळा कोंबून हफिजुल्लाहच्या लहान भावाने त्याची बेदम मारहाण केली. यामध्ये हफिजुल्लाहचा जागीच मृत्यू झाला.

दरम्यान, संपूर्ण प्रकारानंतर हफिजुल्लाहच्या भावाने घराला बाहेरुन कुलुप लावलं आणि बाहेरच झोपी गेला. मात्र परिसरात दुर्गंध पसरु लागल्याने तेथील नागरिकांनी पोलिसांना माहिती दिली. घटनेची माहिती मिळताच पोलिसांनी घटनास्थळी येऊन मृतदेह ताब्यात घेतला. यानंतर पोलिसांनी मृत हफिजुल्लाहच्या भावाची चौकशी केली असता, त्यानं गुन्ह्याची कबुली दिली आहे. याप्रकरणी पोलिसांनी लहान भावाला ताब्यात घेतलं असून पुढील कार्यवाही केली जात आहे.